Fjellhug

Hovedsida  Komande turar  Ruteskildringar  Utstyr Diskusjonsforum  Turboka  Bli medlem  Fjellhugboka  Fjellvetreglane  Lenker


Tur til: Jubileumstur 02.09.2011


Fjellhug 30 års jubileum


Melkevoll Bretun var staden for 41 jubileumskåte hugarar denne fønvind friske fredagskvelden første helga i september det herrens år tjueølljøv. Dei fleste rakk inn før mørkebøkkane blei for trugande mellom store kampesteinar her inn mellom bratte flogfjell og buldrande fossefall.


I utelada samlast store og små til grilling og drøs, koseleg plass der gamalt og nytt sameinast med spennande glas løysning i enden av lada. Tidleg kveld for dei fleste då bussen neste morgon skulle starte allereie kl 9.00.


I lett og mildt haustregn entra 34 morgontrøtte tryne bussen som tok oss over Utvikfjellet til Stardalen i Jølster. Grusveg til Høgstølen der råsa mot Oldeskaret starta. Myklebustbreen med brearmen Haugebreen på vestre side av råsa og Jostedalsbreen litt lenger vekk på høgre sida. Litt småsurt ver på rutas høgast punkt Oldeskaret, men tempen steig raskt når bratte råser bikka kanten mot Oldedalen.


Ei diger sprekk i fjellet var rutas høgdepunkt, der råsa svinga seg inn i "Glyvrå". Nedstigninga var frisk, med kjetting på dei mest utsette plassane.


Vel 7 timar brukte oss på turen med flinke 9 og 10 åringar som yngste deltakarar. Med badstovene på god lunk lenge før trøtte hugarbein kom til gards, måtte det berre bli frisk kulp-bading elva av dei aller ivrigaste vikingane. Dei få utanlandske turistane som var att på camping lurte sikkert på kva slags galningar dette var som meir eller mindre likbleike og lett kledde med badstuvarmen dampande rundt kroppane kasta seg hemningslaust ut i breelva med kauk og kav. Ikkje bere eingong, men opptil fleire. "Norwegian Vikings".


Kl 20 samla både unge og gamle , små og store hugarar seg i "grotta" til jubileumsmiddag. Hjortegryte stod på menyen, med blåbærpai og is til dessert. Nydeleg mat i koselege omgjevnader.


Sjølve "grotta" var eit studium i seg sjølv der den låg fint plassert under ein diger kampestein med bålplass plassert slik at røyken steig ut i friskluft. Fleire spennande inngangar godt gøymt og inneklemt mellom svære kampesteinar. Ein gild plass for friluftsglade hugarar.


Nokre pr - kåte "jasar" frå det særs frilynte tur og kammerkormiljøet i Fjellhug imponerte med meir eller mindre klokkeklare tonar då dei drog eit par stev av den nasjonalromantisk sorten.


Jaseid kammerkor med og hjelp av storblåsaren Magne og gitarvirtous Kjell K. hadde ikkje mindre enn to framføringar denne milde kvelden under hellaren. Seinare imponerte fleire med både song, gitar og pianospel ut i dei små timane.


Egil, Arve, Jon , Magne og Kjell K hadde sklidd rett inn i Jon Eberson Group denne kvelden. Ein særs vellukka jubileumssamling mellom spenstige hugarar på Melkevoll Bretun .


Godt jobba av jubileumskomiteen !